A finestra

E’ na cornici i quatru ssà finestra
Undi a tila cangia tutti i jorna
Hjiuri i gesulminu, hjiuri i ginestra
Mbiata giuventù chi jjù non torna.

Mari pulitu d’acqua cristallina
Undi a natura si sforzau nu pocu
Cielu jiaru chi spunta ca matina
Cotraru ch’esti ntentu nto so jocu.

Campu i granu chi pari ndoratu
Muntagna arta chi non ndavi nivi
Nu muru, du pinnellu culuratu
Nu sceccu vejju chi non vol’i mbivi.

Quantu pitturi passaru ssà tila
I disegnunu jornu, notti e sira
U filu, nta gujja jjù non mpila
Ssà finestra ormai è nira, nira.